政壇：波波發長文硬銷渠務署
陳茂波
唔知係咪呢個禮拜具爭議性嘅話題唔多，發展局局長「波波」陳茂波尋日又再化身「鍵盤戰士」寫網誌，但冇晒平時嘅火藥味，用咗足足千三字去大讚渠務署處理上個月黑雨襲港嘅工作，話雖然當日有水浸同山泥傾瀉，但好彩冇發生區域性嚴重水浸，顯示渠務署過去十幾年嘅防洪工程取得卓越成效。
陳茂波
佢話之前探訪過渠務署，得知當日凌晨渠務署人員已冒雨趕去緊急事故控制中心協調，又喺黑雨前已到咗元朗田心村紓緩水浸，仲話即使暴雨警告上午已取消，但緊急事故控制中心仲運作到下晝六點，大讚渠務署人員一啲都冇鬆懈。
波波話渠務署咁多年積極推行全港雨水排放同防洪工程，消除咗百幾個水浸黑點，未來又陸續檢討全港雨水排放總綱計劃。佢仲用番渠務署嘅宣傳口號大賣廣告，呼籲市民協力保持渠道暢通，深信有你幫忙，定會成功。其實有麝自然香，渠務署做得好唔好，大家有目共睹，佢咁樣自吹自擂會唔會有反效果呀？
