政壇：林筱魯同市建局斬纜
設計圖片及對白
被譽為特首CY梁振英頭號得力助手嘅張震遠，上月因一手創立嘅商品交易所捲入虛假文件案而宣布辭去所有公職，包括行政會議成員同市建局主席等。張震遠擔任市建局主席長達六年，雖然現時由副主席兼行政總監譚小瑩暫時主持大局，但都要盡快敲定新任主席人選平定軍心。
設計圖片及對白
身在梁營呼聲高
官場隨即興起一股「猜猜誰是下屆市建局主席」競猜活動，熱門人選包括啱啱退休嘅前行政總監羅義坤、市建局前執行董事林筱魯同城規會副主席黃遠輝。林筱魯素來被視為梁營一分子，CY競選時更曾邀請佢撰寫規劃政策，如果CY想繼續搵「自己人」執掌市建局，相信林筱魯將會係不二之選。但官場呢頭漏出「林筱魯」三個字，嗰頭又有傳佢因啱啱接替陳智思出任古物諮詢委員會主席，加上又係長遠房屋策略督導委員會成員，令佢太多公職分身不暇。
唔知係為咗斷絕外間嘅流言蜚語，定係唔想再畀人亂扣帽子，林筱魯尋日出席活動時直截了當否認傳聞，話自己已身兼多項「非常重要」嘅公職，由於公眾對此有唔少期望，所以除非佢覺得有足夠精力同能力再擔任其他工作，否則都係專注目前公職。
至於當局有冇搵過佢出任市建局主席，佢就無厘頭話自己喺唔同崗位都有同政府溝通，唔知呢啲算唔算接觸。既然唔答CY有冇搵過佢，咁唔知佢對繼任人選有乜要求呢？佢就用「不在其位，不謀其政」嘅態度嚟答，話自己已離開市建局一段時間，冇辦法作出評論喎。佢咁答唔知係因為實在太多公職頂唔順吖，定係想同市建局劃清界線呢？
