強國人丁錦昊花巨費到埃及遊玩，一如同胞外訪習俗，爬上樂蜀神殿十呎高浮雕之上，狠狠刻鑄「到此一游」的殘體文獻（正體字應是「遊」），還拍下「墨寶」，鋪上網公諸同好，永留紀念。

據大陸微博用戶「空游無依」稱，他用石塊在浮雕上書寫後，曾試過用紙巾抹擦，但不能擦掉，又諗過用水去清洗，卻怕「損壞文物」，好有公德心的一個強國人。他又話，當他心感內疚無地自容時，導遊卻安慰他說這不是他的錯，原因？噢！因當地導遊沒有阻止佢去刮字囉！咪係！過門都係客嘛！若非有呢啲有錢豪客嚟，你埃及怎可以賺到咁多錢呀？

寫幾隻字送畀你，乃是一種交往的禮儀，君不見領導人次次出訪都要題字的嗎？在一個以農立國的小農世界，識寫字係好巴閉的，是文化身份的一種彰顯。倣效領導人題字是一種時髦，也是趨勢！

有乜嘢國家，就有乜嘢人民！

中國四大名著《西遊記》，齊天大聖一個觔斗，翻到五指山下，點止寫「老孫到此一遊」呀！仲屙篤尿作印記添噃！丁錦昊同志已十分克制的了！也或許，佢無睇過《西遊記》咋！

丁錦昊同志的藝術行為，不單只是一個壯舉，將強國現代殘體字與幾千年的古埃及文化cross-over，更有破迷信的科學成就。丁同志刻字的地方，是法老王的保護神浮雕，又話法老王咒語好毒，邊個敢搞佢哋，一定不得好死嘅！今劑就有一個強國人嚟剝你棚牙，吹呀！除非丁同志被五雷轟頂啦！否則，下次爬上你獅身人面像個屁股度放低幾両，以示一路向西之強勢！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps