政壇：政商定格：鄭錦鐘做替工代拉頭馬
鄭錦鐘（左）夫婦喺匹模型馬前作狀拉頭馬，結果願望成真。
沙田馬場尋日舉行渣打冠軍暨遮打盃賽，唔少熱心行善嘅名人都嚟湊熱鬧。保良局主席Eric鄭錦鐘同太太關巧妍恩愛到場，仲拉住隻裝飾嘅假馬影相留念。估唔到願望成真，冇幾耐佢就同德國寶董事長陳國民及藝人陳百祥等老友齊齊拉頭馬，果然善有善報。
鄭錦鐘（左）夫婦喺匹模型馬前作狀拉頭馬，結果願望成真。
其實今次唔係Eric贏馬，而係佢好友莎莎國際主席郭少明太太郭羅桂珍嘅愛駒「美的人生」奪冠，但咁啱郭少明兩公婆齊齊去咗歐洲公幹，於是早兩日已打定電話叫佢代為捧盃。佢自爆買咗二百蚊獨贏同五蚊三重彩捧老友場，帶挈佢贏咗二千幾蚊添！
亞洲電視執行董事盛品儒都喺度，佢話前排工作好忙，所以趁周日入馬場輕鬆吓，當捐錢畀馬會做善事喎。問佢新電視台若獲發牌照，會否對佢哋造成壓力？佢即笑言：「之前已經講咗好多，今日唔講喇。」咁又係，放假係應該放下公事盡情玩嘅！
轉頭又見到工業總會副主席劉展灝，佢透露該會將喺七月換屆，現正忙於籌組新班底。聽聞佢「升呢」做主席嘅呼聲好高，佢就好謙虛咁話自己都希望進一步為業界出一分力。
