設計圖片及對白

喺上兩個禮拜，立法會十樓議員「長毛」梁國雄辦公室發生火警，之後救火花灑狂噴，釀成「水災」，過後立會大樓竟又出現蝨災。

設計圖片及對白

今次蝨災，同長毛同層嘅工聯會陣營六個辦公室無一幸免，一眾議員助理被迫朝十晚六餵蝨，疑似最大蝨主嘅長毛自然被圍剿。估唔到工聯會同社民連呢對鬥氣冤家，由一樓議事廳鬥到上十樓，新仇舊恨炒埋一碟真係唔知點收科。

秘書處尋日一大朝早就派外判清潔工上門，先係清洗地氈同天花，最後放置滅蝨炸彈，實行大屠殺跳蝨。工聯會麥美娟話佢同助理都有畀蝨咬，有同事仲畀蝨咬到要睇醫生添。鄧家彪就話跳蝨被炸一炸，相信已死得七七八八，但房內空氣依然好重化學味道，留耐少少都頂唔順。呢筆帳使唔使同長毛算清楚？

鄧家彪話同長毛辦公室分屬左鄰右里嘅工黨張超雄、新民主同盟范國威反而冇事，完全唔覺有跳蝨出沒，唔通啲蝨都識得針對性發動攻擊？抑或工聯會幾位議員衞生意識不足，惹蝨上門？

第一手消息請下載on.cc東方互動iPhone/iPad/Android/Windows Phone Apps