政壇：人力無毓民 晚宴照爆滿
人力兩周年晚宴，主題係「風雨同路，再創高峰」。
人民力量尋日喺油麻地搞兩周年晚宴，四十圍全部爆滿。人力主席「劉嗡」劉嘉鴻話往年都係喺四月份搞周年晚宴，但今年因黨內有啲風波，所以無奈延遲咗成個月先舉行。佢話今年主題定為「風雨同路，再創高峰」，係因為每個黨總會經歷低潮，相信經此一役，人力會更健康咁行落去。
人力兩周年晚宴，主題係「風雨同路，再創高峰」。
佢哋嘅副主席甄燊港致辭時就話，初時有人同佢哋講，話最少一半人會因立法會議員黃毓民退出人力而「撻訂」唔嚟，但觀乎張張枱差唔多爆滿，令佢相當感動。佢又話雖然毓民因事唔可以同人力一齊努力，而兩派未來更加有機會狹路相逢，但佢就叫支持者要仍然尊重毓民，唔好向對方做出不友善態度。
不過，人力立會議員「大舊」陳偉業就話，毓民助理有一日突然攞咗份退股文件叫佢簽名，要求佢退出普羅政治學院董事職務，而唔係親自搵佢，令佢覺得不被尊重，而佢正籌組緊新組織，仲諗住將佢命名為「普羅民主連線」。至於怕唔怕同毓民嘅組織「撞名」，大舊即刻大大聲咁話：「普羅個名係我諗o架！」
