政壇：鬍鬚曽學藝不精　年年計錯數

繼聲稱自己係中產、平時鍾意飲咖啡同睇法國電影後，佢尋日喺網誌又話自己好想做一個「俠客」，因為早前應中華國術總會邀請，出席咗佢哋舉辦嘅「洪門宴」，仲遇番當年一齊習武嘅師兄弟，令佢回憶當年師公掛在嘴邊嘅六大金句：「家財萬貫金玉樓，不如一技在心頭。日間不怕人來借，夜間不怕賊來偷。腰間一把龍泉劍，兩手揸拳蕩九州。」

「不如一技在心頭」

鬍鬚曾形容呢六句說話嘅意境充滿俠客氣概，簡直型到爆，聽佢口氣，似乎佢都好想過呢種俠客生涯。不過俠客生涯向來獨立獨行，既唔鍾意追名逐利，亦不理江湖俗事。唔通佢暗示自己做緊嘅工作無人認同？其實師公嘅說話真係不無道理，尤其係「家財萬貫金玉樓，不如一技在心頭」呢句，如果鬍鬚曾當年悟性高，識參透師公嘅真理，學識管理財政嘅手藝，咁佢就唔會好似依家咁，年年計錯數，坐擁幾千億儲備都唔識用，仲要做守財奴，呢啲係咪學藝不精呢？

吹完水後，佢話今個星期會公布發行新一期iBond嘅詳情，六月就會去立法會申請電費補貼、代交公屋租金等撥款。既然佢咁想做俠客，不如佢上立法會時嚟個「楚留香造型」，咁搞法分分鐘可吸引師奶支持。