SUN搞作：SUN官場現形記：父子兵
貪曾畀人踢爆虛報地址，貪曾細仔「小曾子」就瘟女瘟到上雜誌，認真一門雙傑！尋晚李衞就潛入貪曾大宅，偷聽到一段對話……
小曾子：（哀求狀）爸，我想轉Look呀！
貪曾：轉「轆」？我畀你嗰部平治S320L呢？
小曾子：（哀求狀）唔係呀，我想轉Look呀！
貪曾：你想轉咪轉囉！但記得轉埋個地址喎，好易出事o架！
小曾子：（失落狀）我意思係我想改善吓外表，例如變高啲、髮線生番前啲、魁梧啲……
貪曾：「縮數」我就識……至於生番啲嘢出嚟，好難喎！
小曾子：（哭泣狀）我陪豹女落pub fing兩fing，啲頭髮就甩晒出嚟，畀人笑到面黃……
貪曾：搽白蘭地可以生髮喎。大家都係酒，照計茅台一樣得，我叫阿湯送啲畀你啦。
小曾子：（一愕）咁煲當歸係咪可以增高？阿湯高過你好多喎！
貪曾：矮仔多計呀！佢高過我，依家咪畀老廉查囉，我反而咩事都無！
小曾子：（破涕為笑）真o架？咁我似足老竇你，實係叻仔啦。我哋飲勝！
貪曾：（驚訝狀）咁多酒，邊度得嚟？
小曾子：琴晚我同豹女食飯打包o架，仲有鮑魚同龍蝦添。餐飯我一蚊都無畀過呀！
貪曾：果然叻仔！
