SUN奇古怪：Sun潮語：【旅霸】
「旅霸」唔單止係潮語，簡直係近年嘅潮流。「旅霸」係用嚟形容一啲訪港旅客故意投訴其旅行團貨不對辦，要求賠償。
2003年開放個人遊以嚟，每年香港就多咗大量鄰近地區嘅旅客訪港，嚴重衝擊香港社會各方面。依家香港好多地方，已經完全唔係為香港市民服務，而係為個人遊嘅人民同人民幣服務。
十年過去，個人遊計劃除咗為香港社會帶咗些少經濟上嘅貢獻外，亦令本地文化產生質變。所謂嘅「經濟利益」，主要都只係得大地產商，同連鎖名牌店及零售網絡受惠。香港人嘅生活大受影響，真係食碗飯都唔知可以去邊度。一到大陸長假黃金周，市區直頭水洩不通。呢幾年仲有個人遊旅客，升呢成為「旅霸」，公然嚟屈錢，個人遊政策係咪有檢討嘅必要呢？
有關方面有時會賠錢，有時會賠償多一晚住宿。好似早排五一黃金假期，有個大陸旅客死都唔肯上旅遊巴，仲喺記者鏡頭面前哭訴被騙，男人之家流晒眼淚，真係我見猶憐。佢喊完之後隨即要求賠償，旅行社方面當然否認責任，但結果嗰位痛哭男都成功屈到賠償，呢啲就真係「旅霸」啦。
咪以為「旅霸」淨係針對偉大祖國，又或者想挑起族群矛盾。其實如果有外國人做同樣嘅事，無論佢哋係嚟自英美法俄日南北韓賓泰星，都一樣會被稱之為「旅霸」，並予以譴責。
不過，除咗強國人之外，第二個國家嘅旅客又真係好少咁樣做「旅霸」。當然，強國人都一視同仁，佢哋唔止嚟香港做「旅霸」，喺第二啲國家都一樣會咁，所以近年外國對大陸遊客都敬而遠之，呢啲咪就係叫做大國崛起囉！
