政壇：搞搞政：廖長江患鏡頭恐懼症

一對住就唔舒服

Martin本身係大律師，唇槍舌劍早有心得，但佢話上庭同對住鏡頭唔同，因為上庭基本上只係對於法官闡釋論據，目標好清楚，相反佢一對住鏡頭就覺得唔舒服，所以上任議員至今都推咗唔少電子傳媒訪問。佢又話，其實都諗過解決辦法，就係搵吓有冇教人面對鏡頭嘅課程，但佢笑言由於課程太貴，自己負擔唔起喎！

結果若論議員曝光率，佢一定輸蝕。Martin話，作為議會新丁，佢都擺咗唔少心機時間喺議會，上任首月開親會都坐定定聽足各位議員發言，並記低重點，但發現基本上每次辯論重點都係五、六個，當有人講咗佢想表達嘅內容，佢就唔會重複論點，一切以有冇新論點表達為出發點，認真有自己一套議事風格。