政壇：區會廢委任議席傳設顧問
立法會日前三讀通過區議會條例修訂草案，即二○一六年新一屆區議會將會全面取消所有委任議席，只繼續保留由鄉事委員會主席出任嘅廿七個當然議席。雖然當局因應全港各區人口數目而增加十九個直選議席，但取消委任議席都影響好多地區勢力。地區上傳出聲音，建議政府取消委任議席後，增設「區議會顧問」一職。
「區議會顧問」同委任區議員有乜唔同呢？最主要分別就係區議會顧問冇投票權。有地區人士分析，獲委任嘅加入區議會做顧問嘅人，雖然冇投票權，但可根據本身嘅專業知識提供意見，從而影響或令議會調整原本嘅決定。而且，增設「區議會顧問」另一個主要作用，就係安撫部分委任區議員冇得撈嘅心情，要知道，取消委任制嘅聲音己經討論好多年，有委任區議員埋怨政府利用完佢哋後就「用完即棄」，漠視佢哋多年來嘅功勞。
不過，「區議會顧問」雖然冇投票權，但一直反對委任制嘅泛民主派都未必會支持。有官場中人透露，確實曾聽過有地區人士提出在區議會設立顧問角色，僅列席提供意見，而不設投票權，但目前只係初步討論階段，當局對此未有立場，又會在稍後舉行嘅地區高峰會，繼續聆聽地區人士嘅意見。
