政壇：黃錦星減廢有排煩
設計圖片及對白
香港人均垃圾量多過好多國家及地區，廢物棄置嘅警鐘早已敲響，日前，環境局局長黃錦星宣布香港資源循環藍圖二○一三至二○二二年，翌日又推出咗三個堆填區方案、仲拿拿聲建議向立法會財務委員會申請最少九十億元撥款做擴建及顧問研究添。呢招藍圖掩護堆填區嘅招數雖然妙，但民間反對聲音仍然迅速集結，將軍澳區今日就有個大型居民遊行向堆填區Say No，主辦團體估參加人數分分鐘高達千人，睇嚟黃錦星有排煩囉！
設計圖片及對白
四圍撲落區游說
當局三年前喺堆填區擴建一事上先輸過一仗，依家局長換咗人，黃錦星肩負重推堆填區嘅重責，睇番今次政府嘅部署，都可以發現環境局巧妙包裝一番，譬如以香港資源循環藍圖為名，大範圍講未來各種循環政策及構思，轉個頭原來堆填區至係主菜，當局明顯係希望以減廢來抵銷擴建堆填區嘅負面印象，不過，包裝始終係虛嘅，游說各界支持先係黃錦星嘅當前要務，所以佢同政治助理區詠芷今日聲音兩邊走，撲去唔同電台，推銷方案，介紹建議都好，目的都係為消除反對聲音。
不過，堆填區方案嘅反對勢力唔小，「終極關閉將軍澳堆填區大聯盟」今日就會喺將軍澳區發起居民大遊行，地區人士話到明參加活動嘅居民由幾百至千人不等，佢哋不滿將軍澳區依家都受臭味、空氣污染等問題影響，斥責政府喺二○一○年嘅失敗之後仍然死心不息，依家又再建議擴建十三公頃土地作堆填區，勢必加重環境污染，所以一定要Say No。
