政壇：政商定格：兩名廚減肥對決籌善款
杜振源（左二）帶頭捐靚酒供拍賣，好友陳正欣（左一）、王道源（右一）同李逢樂（右二）齊呼應。
「快勞夾大王」兼國際小母牛香港分會籌款委員會主席Simon杜振源早前喺旗下蘭桂坊米芝蓮星級食肆包場宴客，每位盛惠一萬元，百名賓客踴躍買枱，即刻有過百萬元善款入帳。加上靚酒及名人減肥「賣肉」作為慈善拍賣，一晚就籌到逾四百五十萬元，認真有計。
杜振源（左二）帶頭捐靚酒供拍賣，好友陳正欣（左一）、王道源（右一）同李逢樂（右二）齊呼應。
重量級名廚Harlan（左）同Alvin為慈善「賣肉」。
今次有份賣肉嘅星級名廚Harlan Goldstein，係Simon嘅食肆投資拍檔，難怪Simon即刻承諾捐十萬元響應壯舉。Harlan減肥籌款嘅野心好大，當晚只係試吓善長水溫，實情係佢同另一位星級名廚「廚魔」Alvin，尋日開始為期三個月嘅減肥對決，到時睇吓邊個減磅幅度較大，負方就要着女侍應制服到對方嘅餐廳做一日侍應，十分搞笑。Harlan會將籌到善款捐畀小母牛，而Alvin就捐畀另一間慈善機構。
