政壇：亂用立會咪架 林卓廷捱轟

由於林卓廷做過廉署調查主任，所以最近成為「貪湯」湯顯明事件嘅狙擊手，但佢多次喺立會擅用咪架發表言論。本來無乜人留意呢件事，但議員「象哥」黃定光喺電視上見到後就把幾火，覺得白鴿黨無晒規矩，所以喺日前行政管理委員會上，象哥即刻拎件事出嚟傾。象哥話只要秘書處講明准許非議員用立會咪架，佢唔會有不滿，因為佢會叫晒黨內班兄弟落立會，到時睇吓邊個黨多人啲囉。嘩，象哥今鋪真係好有霸氣，連出名惡嘅白鴿黨主席劉慧卿都唔敢出聲反擊。

象哥嘅不滿原本唔喺行管會會議嘅議程上，但討論之後，大家就決定發出一份備忘錄畀全體議員，提醒佢哋唔好畀黨友亂用立法會設施。