政壇：最低工資爆拗數戰

繼潘少質疑現時最低工資調整幅度追唔上通脹後，社福界「阿柱」張國柱同工黨張超雄都向勞工及福利局局長張建宗發炮，質疑加兩蚊條數點計。張建宗就好似教小學生上堂咁逐個議員教，話最低工資水平調升百分之七點一，大約係三十蚊四毫，非常接近過去兩年累計百分之八點四嘅通脹率。

問標準工時 郭偉強離題

阿柱之後問點解政府唔用方程式逐年調整最低工資金額，但就被張建宗反駁依家幾乎所有國家都用一籃子因素計算社會福利，淨係得法國仲係用方程式。佢之後又話方程式未必可以準確反映民情，之後又有啲火滾咁講咗句「如果方程式計到有通縮，咁你係咪減最低工資先？」佢之後話政府從來都冇排除一年一檢嘅可能性，又話社會經濟形勢經常有變，如果政府改為一年一檢，有啲無良僱主可能會改為每年同僱員簽約，或者索性將合約零散化，最終受害嘅只會係全港嘅打工仔。

工聯會嘅勞工界議員郭偉強，就批評標準工時至少三年後先可以實施，最低工資亦加得太少，問局長依家點可以確保工人唔會好似捱騾仔咁返足十幾個鐘。雖然郭偉強只係偏離少少質詢內容問標準工時，但就仍然畀主席曾鈺成質疑佢發言唔對題，要佢改下條問題先可以再問過。不過，郭偉強改問題再問都冇用，因為張建宗都係好似錄音機咁播帶。