SUN世代：俊臉加鐵嘴逢關過關

三歲定八十，眼前的Anthony侃侃而談，信心十足。他打趣說，從小到大，憑一把鐵嘴，一張俊臉，任何時候都是超人氣人物。不論童年跑到鄰居索蛋糕，長大後見工面試都沒難度，做就自信人生，令記者不禁向他索相，要一睹其兒時真面目，有圖有真相。

「細個住尖沙咀山林道，人見人愛，成個明星咁。」Anthony形容：「有時仲走上人哋屋企，問啲姐姐畀件蛋糕我食，我唔識佢o架，但佢又肯畀喎，因為我靚仔，又識講嘢讚吓人囉，哈哈。」

長大後，見工當營業經理到創業當老闆逢關過關，他曲線自讚：「一來我對時裝有觸覺，二來你派人代表公司去見客，都希望搵個外表好啲啦。」九七年，他申請加拿大技術移民，稱自己是製衣專才。移民官拿起一塊布問他用甚麼儀器測試到是其材料及染法，他一句﹕「摸上手就知啦。」就嘩啦嘩啦說出來，十分鐘過關。不過，他只是鬧着玩，旨在一試身手，坐完移民監，就沒有回過加拿大。