SUN世代：文物月老
生意經，對從事製衣業的游錦榮（Anthony）來說，倒不如說是交友經。游走中港商界十多年，由新客變死黨，憑一句話，熟客即商借千萬。做到四海皆兄弟，他認為要講腦又講心，但真誠最重要，憑他擅長的交友學，加上文物鑑定專家相助，他深信有心，行行可拓人脈、當月老，替客戶速配心頭好。
游錦榮（Anthony）
與多位文物專家合作，Anthony（右二）自信可為文物找到知音人。
交朋友講真心，Anthony（右二）與多位舊同事關係良好，不時聚會。
對時裝有觸覺，Anthony青年時打扮入時。（受訪者提供）
Anthony自覺俊俏，從小到大都盡得人緣。
活躍社團，更為多個商會要員，Anthony相識滿天下，機遇處處。去年，他與商界老友成立文物買賣公司，沾手文物界。雖自九四年便當製衣老闆，他雙手合十謂，自小鍾愛文物，讀理科的他中五時亦自修歷史，如今終日與文物為伍，算是一償心願。
人脈，不但給他商機，更予他不死身。他打趣說：「有次我同個客講笑，新年仲差一千幾百萬先出到糧畀員工。點知佢第二日打電話嚟，話準備好現金可以借畀我。」
令客戶老闆由新相識變好兄弟，全賴小技巧大智慧，做人處世之道，「賺到錢嘅老闆個個有腦，咪以為用兩下花招就令佢當你係老友。」難怪Anthony說寫一本書亦說不完：說心態，他認為要肯蝕底，「對方要求多多，令你無錢賺，都唔好計較，你唔知佢係咪只係想試下你，加上你一計，人哋又計，互相防範，就做唔成朋友。」講技巧，他稱：「有時叻人都要扮蠢，費事人哋對你有戒心，否則你生意唔會愈做愈大。」
說到底，交商界朋友首要講心，他說：「你可以有目的識佢，但之後要真心對佢，花心思關心佢，好似追女仔咁。結婚生日，可以送少少禮物，唔使貴，有就得啦，最緊要有心。」
信任建立，一切易辦事，遇到問題互通電話即可解決。商場上已穩打穩紮，事業上他追隨新夢想，「唔可以停，歷史係不斷重複，當你自滿，開始享樂，或者交生意畀人打理，自己唔過問，你事業就會走下坡。」
Anthony's Profile
現職：深圳特豪文物公司董事
公職：香港智道總會主席、香港山西商會副會長
興趣：音樂、旅遊、中國歷史
