真係一百歲唔死，都有新聞聽。全球幾千年以來，地球上從沒有一個地方政府，敢膽話會「無議題」、「無嘢好傾」而「休業一天」的！

只有人治的家族式私人機構，才會失驚無神，喺舖頭大門貼張紅紙話「東主有喜」，唔做生意。

香港特區政府創意無限，敢作敢為，更不理世俗眼光，自行踏出人類一大步：「行會無議程，取消例會」。

話明係「例會」，即原定「每周例必舉行的會議」，又怎可話摺埋就摺埋。星期二開會，星期一下午才廣告天下，咁做嘢，擺明係特意打破英國佬制訂的殖民論議制度，建立偉大祖國行事新模式啫！本來，可藉此「反常」行動，彰顯一次強國本色的架勢，點不知，那個多嘴貪威的big mouth掃把頭，見全港群眾勁評行會偷懶，收人工唔做嘢，於是，此婆乸自把自為撲出嚟話今次唔開會，唔係有人想包庇下屬避見傳媒扮縮頭龜，而係上星期尾早已得悉無會開；另一個疑似下屆特首人選的李慧琼大嬸就更浮誇，話上星期二已有人話過，本周可能唔開會，吓！乜一星期前，就預知整整七日無嘢發生？有人唔養錦鯉，改養鬼仔乎？

若要開會，又點會無議題吖？你哋無？嗱！我大把！家陣免費送畀你哋又點話吖，大家研究吓坪石邨個髮型師點解咁有創意，可以發明一個掃把頭嘅？又可以估吓貪曾幾時伏法呢？噢！仲有，研究吓點解政府最高層的民調愈調愈低嘅？甚至，傾吓點解堂堂一個行會，會無議程，足可以講幾日啦！要傾，又點會無嘢傾吖？太低能、弱智和垃圾了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps