政壇：搞搞政：啟剛料掌港青聯更上層樓
設計圖片及對白
香港青年聯會主席任期規定每屆一年，但現任主席葉振都舊年就「捱義氣」，冧莊做多一屆，睇怕年中都要退位讓賢。據聞主席呢個位將係現任常務副主席霍啟剛嘅囊中物，事關舊年一早熱傳佢會接棒，但佢當時想先成家立室，決定暫不接任主席。啟剛喺舊年底迎娶「跳水公主」郭晶晶，人生大事圓滿完成，如無意外會喺七月接棒，有傳佢會做足兩年添！
設計圖片及對白
青聯主席一職塵埃落定後，另一邊廂中華全國青年聯合會副主席之爭隨即開始上演。眾所周知，依家全國青聯副主席有兩個香港代表名額，分別由製衣大王陳元鉅兒子陳仲尼同新世界發展執行董事兼聯席董事總經理鄭志剛擔任，前者喺今年三月「升呢」為全國政協委員，好大機會喺兩年後卸任全國青聯副主席，相反鄭志剛有可能再度連任，即係兩年後全國青聯換屆，料最少有一個空缺畀香港年輕才俊爭崩頭。
由於歷來全國青聯副主席嘅香港代表，幾乎都由香港青聯主席出任，咁葉振都同啟剛順理成章成為未來全國青聯副主席嘅熱門人選，睇吓邊個最後可以順利跑出？
