政壇：富貴黨暗示標準工時拉布
「拉布戰」唔係泛民獨有權利，建仔早喺九十年代末已經用呢招，估唔到連富貴黨都諗住用。富貴黨榮譽主席Miraim劉健儀認為，現時《議事規則》第九十二條賦予立法會主席太大權力，幾時剪布由主席自己演繹，如果將來該黨喺標準工時立法時拉布，分分鐘被主席剪咗布都唔知喎！
Miraim話該黨話唔定喺審議標準工時時拉布，所以基本立場係認為立會要有完善剪布機制，唔係主席想點剪就點；佢建議設立終止辯論動議，只要經分組點票通過後就唔准再發言。該黨之前既唔支持拉布，亦冇參與聯署要求主席剪布，依家又話將來有可能拉布，立場難以捉摸。
雖然佢冇做議員，但未來會繼續主力政策研究，而田北俊啱啱喺無對手下自動當選成為該黨首名黨魁，日後負責議會內嘅投票立場，而地區工作就交由黨主席周梁淑怡，三人咁樣分工法，有冇效就要拭目以待喇。
