政壇：郭少明自爆通過波仔
郭少明自爆五、六年前通過波仔，心臟血管放咗兩個支架。
莎莎國際主席Simon郭少明尋日出席科技大學嘅科研發布會時，自爆喺五、六年前通過波仔，心臟血管放咗兩個支架，所以依家好緊張身體，仲話「保養自己好重要」，每日磅重一次，一旦重咗就會注意吓喇。
郭少明自爆五、六年前通過波仔，心臟血管放咗兩個支架。
Simon坦言有支架喺身上，硬係覺得「有啲嘢」，唔係咁好，所以佢聯同太太郭羅桂珍捐咗五百萬元畀科大，科大花兩年時間，終於研發到一啲會自然分解嘅支架，造福腦中風病人，話唔定遲啲就到心臟病人受惠。佢尋日同太太出席有關科研項目捐贈儀式，差唔多全家出動支持，包括大女郭詩慧同老公陳振邦、二女郭詩雅同郭老太都撐場，教育局前局長孫明揚太太鍾小芬都去支持老友善舉。
鍾小芬話孫公退休生活好他條，精神又好，腎病情況都穩定，依家最忙就係同七歲及八歲孫仔捉棋。
