政壇：立會水浸係特登嘅
設計圖片及對白
添馬艦新立法會大樓早前因為社民連「長毛」梁國雄嘅議員辦公室一場小火，消防自動灑水系統搞到五層樓濕晒，令人懷疑新大樓係咪因趕工而變成豆腐渣工程，咁都係怪「貪曾」前特首曾蔭權爵士好大喜功所累。
設計圖片及對白
大樓變濕地公園
行政管理委員會尋日就討論呢單嘢，仲邀請埋三位負責官員到場解釋。聽完之後先至知，原來漏水係特登嘅，真係估佢唔到。有行管會成員引述話，政府解釋門窗同地板之間留有空隙，係因為要預留空間畀建築物料冷縮熱脹，所以樓上嘅積水先會向下四圍漏。
至於點解啲水可以漏落下面五層樓咁多，同埋個自動灑水系統點解會狂噴水？與會嘅政府官員解釋得仲神奇，話漏咁多水係意料之內，咁做可以係防止其他樓層着火，令火勢可以得到全面控制。至於灑水系統狂噴，原來並無失靈，當日足足噴咗半個鐘頭，本來立法會保安可以閂水掣，但保安驚火勢死灰復燃，點都要等到消防員到場至肯閂水掣，所以搞到立法會好似濕地公園咁。
今次漏水風波，唔單止長毛辦公室災情慘重，而喺佢樓下唔少議員嘅辦公室都損失慘重，尤其係啲電腦、打印機咁要報銷。咁到底班議員有冇得索取賠償呢？據聞，只要係立法會資產、用公帑購買嘅所有物資都有得賠，但議員嘅私人物品有損失，立法會就愛莫能助，講到底今次都係長毛累街坊喇！
