香港人一直以來，都愛大驚小怪，縱使微不足道的倒瀉屎，也圍滿一大群看熱鬧的無聊人，指手畫腳，說三道四，高談闊論，唔當眾大呼小叫一下，會自覺係無存在價值的發霉涼粉咁，丟落垃圾桶，老鼠都唔食！

香港特區政府破天荒的，宣告「今日行政會議因無議程，要休息一天」，如斯老實的開誠布公，話無嘢好傾，叫啲人唔使返工，連冷氣費都慳埋，減少公帑浪費，有乜唔好？哼！點知，你班香港刁民，七嘴八舌嘈生晒，濫用言論自由！

細個（即無腦）嗰陣，聽過有大人講乜嘢係「成功管理學」，佢話，點樣為之係一個叻嘅老闆呢？就係——佢乜都唔使做，日日去「打歌芙」同溝女飲茅台，或坐遊艇、睇新屋裝修……正所謂「猛將手下無弱兵」，有嘢都留番手下去做啦！使乜自己去倒痰罐o架？

同樣邏輯理論，香港政府官員高手雲集，點會有嘢搞唔掂o架呢？三扒兩撥加上港人的善忘症病發，幾大鑊都無有怕啦！

嗱！我真係諗唔到佢哋開會要傾乜喎！有人遊行示威咩？勇武警犬大大隻喺度，今次熊抱破山爪，下次咬人添噃！政改佔中呢啲層次嘅嘢，有西環揸莊，毋須費神。有關土地利益之事，長遠房屋策略督導委員和市建局張震遠會密切留意，好放心！至於環保，仲巴閉，那黃錦星局長提出「轉廢為能」的方案，啱晒成個政府全體人用！正到痹！

梁振英特首一早講咗「民生無小事」，早早說過「小事」都無啦！仲有乜好做？開乜會呢？休息一日都唔畀，你班香港人好殘忍啫！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps