政壇：政商定格：股東會逼爆林高演加位
見到咁多股東嚟，林高演應該好開心。（資料圖片）
香港小輪尋日喺酒店大禮堂開股東大會，反應非常踴躍，筵開二十四圍仲唔夠坐，再臨時開多兩圍都唔能夠滿足需求，需要喺另一個房間再開多一圍半招呼遲到嘅股東，但呢一圍半因事前冇預酒菜，最終只能食三文治、咖喱角等小食。有幾位小股東感到非常不滿，開始鼓譟，大鬧有冇搞錯。雖然場面有啲混亂，但香港小輪主席林高演見到咁多股東嚟，都應該好開心。
見到咁多股東嚟，林高演應該好開心。（資料圖片）
問番小輪嘅負責人，以往公司預二十至二十二圍通常都夠，有時仲有位剩，但自○八年開始突然多咗股東參與，舊年加到二十四圍都仲要凸幾個人。今年係以去年嘅經驗訂二十四圍，再有兩圍做後備，估唔到仍然唔夠坐。負責人就承諾，會開會檢討預訂酒席嘅安排，而公司招呼股東食番餐呢個習慣，已實行咗二十幾年，絕對唔會因今次事件一刀切以後唔搞。最後小輪向未能入席嘅股東每人送兩張餅卡，希望聊表心意。
