政壇：鄧惠鈞辭任新聞統籌專員
鄧惠鈞辭職，佢話係因為身子需要好好調理。（資料圖片）
特首CY梁振英上任未夠一年，已有心戰室成員離任。舊年八月下旬至上任嘅特首辦新聞統籌專員June鄧惠鈞，原來上月初已向CY遞信，決定劈炮唔撈，現時只係商議緊幾時走人。不過阿June強調今次走人並非同任何人不和，亦唔係份工唔好做，只係返工後身體愈嚟愈差，近月仲發現有耳鳴現象，加上雙眼又有輕微白內障，決定先向CY請辭，休養好身子再講。
鄧惠鈞辭職，佢話係因為身子需要好好調理。（資料圖片）
近期耳眼出問題
新聞統籌專員（IC）係特首辦心戰室重要成員，理應陪伴CY左右。但早前唔少傳媒發現阿June甚少喺CY身邊，已惹來各方猜測，但佢就同人講，不必陪伴左右係特首嘅諗法。今次June決定辭職走人，大家唔夾嘅講法一定會傳到真嘅一樣。
不過，阿June同我哋講，今次離職真係同身體有關，唔係同CY、特首辦其他人不和。佢話近排耳同眼都出現問題，耳仔開始有耳鳴，十分滋擾，雙眼則因為好多年前做過第一代矯視手術，後遺症近日愈嚟愈嚴重，證明係時候休息一下，調理身子。
阿June係資深傳媒人同公關能手，曾任無綫電視新聞及公共事務部總監，九九年轉投公關，任職馬會公共事務主管，而IC一職屬首長第4級（D4）職位，起薪點十七萬五千幾蚊。
