政壇：議員鬥揣測狂抽水
設計圖片及對白
行政會議今日將暫停開會一次，惹起各方揣測。其實行會周二唔開會並唔係咩新鮮事，例如人大兩會期間，或者施政報告公布前夕嘅周二都唔會開會，但奇就奇在尋日特首辦罕有解釋，取消會議係因為「沒有議程」，結果「開誠布公」變成愈描愈黑。
設計圖片及對白
點解惹起咁多揣測？其中一個原因係時間實在太敏感。上星期一度傳出，行會將喺今日商討免費電視發牌，加上行會成員張震遠近日被傳陷入財困，雖則佢已發聲明否認，但未有現身交代，兩件事令傳媒關注聚焦於今日行會，可想而知，特首辦尋日一句「沒有議程」係有幾反高潮，結果仲成為眾多議員嘅抽水目標。
葉劉話文件未準備好
立法會議員林大輝尋日話對特首梁振英用「沒有議程」為由，取消行會感到好憤怒，事關議員流會就受千夫所指，但特首就可自己搞流會，隨意取消行會，相當唔公平。曾做過行會成員嘅富貴黨田北俊就相對淡然話，其實行會唔開會一啲都唔奇，事前話聲畀記者知可能都係費事記者摸門釘。田少仲話其實現屆政府比貪曾政府已勤力好多，經常開行會開到下午兩、三點，但有無效用就唔知啦。至於泛民議員質疑行會有咩理由無議程，仲有政黨發動市民去信特首辦建議議程添！
見班立會同事抽水抽得咁開心，身兼行會成員嘅葉劉淑儀尋日率先撐政府話，無議程唔代表社會無問題，仲「微調」話今日唔開會只係因「唔夠item（議程）」，並唔係無議程，又話政府有啲文件未準備好，所以先唔開會，但佢就話自己唔係講免費電視發牌文件，又話唔開一次會唔會影響免費電視發牌程序，亦唔係要保護連日被傳媒追訪嘅張震遠，跟住仲話呢啲只係佢個人推測。
另一行會成員李慧琼就話上星期二都好似有人提過，今個星期二有可能唔開會，又話行會周二開會都唔係鐵板一塊喎！
