政壇：政商定格：鄭承隆留言力撐趙哲妤
趙哲妤尋日戴咗黑超，出席一個公開活動。
各大政黨都積極吸新血，好似新民黨最近就有二○一○年中國小姐香港賽區冠軍Uny趙哲妤入黨，自此滿城風雨，有人質疑佢入黨嘅目的，又有人指佢形象對黨有影響。
趙哲妤尋日戴咗黑超，出席一個公開活動。
新民黨青委會主席甘文鋒日前喺社交網站發表一篇長達八百字支持Uny入黨嘅文章，話政黨形象喺支持或反對某啲政策時已受影響，議員發言又會有影響，所以如果以有負面影響就否定一個人嘅話，就乜都唔使做。就連副主席Edwin鄭承隆都留言話日久見人心，「不招人忌是庸才」，作為副主席，再多攻擊都願意同佢哋一齊承擔咁話。其實之前有人批評Uny時，Edwin已用自己作比喻，話就算只有三分鐘熱度，都起碼貢獻過三分鐘吖！咦？Edwin唔怕女朋友呷醋咩？怪唔得佢上次見到我哋時，都笑住話要快啲同女朋友拉埋天窗避嫌啦！
