政壇：橄欖囝囝「潛水」避長毛
觀塘區議會坪石選區下周日舉行補選，由啟業邨屋企徒步過嚟嘅「長毛」梁國雄硬撼建仔「橄欖」陳鑑林囝囝「傑仔」陳俊傑，以填補陳百里嘅空缺。長毛尋日喺坪石大搞造勢大會，泛民喺區議會補選單挑建制派，近年較為少見，唔少喺立法會杯葛拉布四子嘅泛民政黨都派代表撐場。面對泛民群起而攻，傑仔尋日就選擇唔現身拉票。
「慢必」陳志全議會內外都咁撐長毛，仲自爆拉布期間不停要求點人數，就係希望「點到流會就可以畀長毛落區（拉票）」。郭家麒就重提傑仔企圖「世襲」爸爸議席，呼籲邨民喺大是大非面前要認清自己企邊面。
反觀傑仔，除尋日獲新民黨葉劉淑儀幫手派傳單，其餘時間全程「潛水」，對世襲指控亦只透過選舉經理洪錦絃反駁，係泛民炒作舊聞，仲話傑仔選前一周要積極備選，冇乜事都唔接受傳媒訪問。傑仔唔見傳媒可能係策略，唔好連市民都唔見就諗住贏梗就得嘞！
