政壇：鬍鬚曾自嘲失匙夾萬

偷換概念混淆視聽

雖然只係識出口術，但不得不讚鬍鬚曾今次多咗少少幽默感，識得自嘲一番。佢話近日被市民問起點解政府坐擁七千幾億元儲備，但面對幾名議員拉布就要陷入資金短缺危機，佢解釋政府看似好多錢在手，但只係「失匙夾萬」，如果無鎖匙在手，政府唔可以隨便動用一分一毫。

咁到底邊個先可開啟呢個千億夾萬呢？鬍鬚曾話立法會議員先係鎖匙人，因為所有款項都要得立會批准，立會一日未通過撥款，政府有錢都無得使。佢咁講法，未免偷換概念，話晒議員拉布都係政府唔畀全民退休保障，似乎鎖匙人角色係政府囉！

「剪布手」曾鈺成同樣出口術，但手法高明得多，成功營造幫理不幫親形象。佢尋日話剪布之前，的確諗過將剪布權交畀議員，由議員提出終止辯論議案，但諗過度過認為無法理基礎，最終決定由自己出手。佢解釋，《基本法》訂明議員議案要經分組點票通過，唔係全體三分二議員支持就得，如果貿貿然話三分二議員贊成就可終止辯論，咁做法有可能違反《基本法》。再加上咁做等同自訂議事規則，亦有違早前高等法院嘅判決。