政壇：搞搞政：余漢坤參選傳有人開路
設計圖片及對白
離島區議會共有二十一位議員，其中總面積有一百五十平方公里嘅大嶼山選區，因早年將東涌、愉景灣同逸東等選區劃分開去，所以該區再無南北之分，歸一成為大嶼山選區。當區區議員黃福根就向我哋呻，話選區面積太大，平時服務居民做到索晒氣，所以建議將選區一分為二。
設計圖片及對白
有離島地區傳聞話，由於下屆區會取消委任議席，意味委任議員余漢坤（新界鄉議局主席劉皇發嘅女婿）如果想連任嘅話就要參加直選，所以除咗年前同黃福根喺大澳同梅窩開聯合辦事處外，亦有傳黃福根一直幫佢搵位出選，同近日佢建議將選區分拆不謀而合。另有傳聞話，黃福根做埋今屆就退休，會將議席交棒畀余漢坤，至於成功爭取將選區一拆二嘅話，新增嘅議席就留畀有志服務地區嘅鄉紳喎，究竟係咪真有其事呢？無論係點，都似係為余漢坤轉直選鋪路。
余漢坤日前出席一個活動時話，冇聽過黃福根話要退休，且相信大嶼山分拆兩個議席嘅機會唔大，又話冇理由要老友讓位畀佢參選，下屆冇得選就喺另一範疇服務社會喎！
