政壇：梁栢賢肥胡變超能先生
胡定旭（右）同梁栢賢化身「超能先生」。（受訪者提供）
醫管局尋日舉行年度研討大會，行政總裁PY梁栢賢致辭講到醫管局點面對未來問題時，螢光幕忽然彈出PY同主席「肥胡」胡定旭扮成動畫《超人特攻隊》入面嘅「超能先生」，一手托起班醫管局員工，寓意佢哋帶領醫管局迎接挑戰。
胡定旭（右）同梁栢賢化身「超能先生」。（受訪者提供）
PY講到醫管局面對人手短缺障礙時，一隻「醫管局憤怒鳥」已喺椏杈準備就緒，示範點射散晒啲障礙。肥胡就好感慨，引用徐小鳳名曲《順流逆流》歌詞，鼓勵醫護「得失要睇透」。其實依家醫護人員面對咁多壓力，肥胡不如搞好啲管理，好過喺度扮嘢氹員工啦！
