政壇：鼠王芬組班抗民主阿婆

不甘寂寞嘅「民主阿婆」前政務司司長陳方安生呢個舊電池又乘機出嚟抽水，早前仲拉埋另外幾個舊電池出嚟搶閘成立「香港2020」政改平台，揚言要關注商界聲音，之不過，言論一出，民主阿婆呢個政改春秋大夢就被商界柴台。

望訂平衡政改方案

除咗商界唔睇民主阿婆呢台戲之外，據聞就連西九新動力立法會議員「鼠王芬」梁美芬都睇唔過眼，以城大法律學者身份聯同多名學者，醞釀成立新平台抗衡民主阿婆。

消息指出，建制開明派嘅學者，眼見政改討論一切以政治掛帥，擔心一旦特首普選落實後，民粹主義會迅速抬頭，正醞釀學界沉默嘅一群站起來，制訂同時考慮經濟同政治方面影響嘅政改方案，又話：「我哋係想諗個可行嘅方案，而非山埃嘅方案。」

據聞，呢個新政改平台以華人學術網絡成員為基礎，所以鼠王芬、科大工商管理學院院長鄭國漢等人好大機會加入，又傾向不設立召集人，以示各人平等參與。話時話，鼠王芬等人網羅晒有商界聯繫同熟悉經濟嘅學者，矛頭直指包裝成關注商界聲音嘅民主阿婆。民主阿婆如果有自知之明，都係快啲將自己個平台「摺埋」，否則連最後生存空間都被趕絕先草草收場，就認真肉酸喇！