十六年前，香港是世界各地及鄰近地區所羨慕的「國際大都會」，一切都來得有文明、先進和希望；今天，哈哈！經過昏庸、貪腐和謊話的洗禮下，此地已成為一個比老夫子笑話更耐人尋味的「第三世界」矣！

即使六十年代，因貪污而偷工減料建成的「鹹水樓」，也不會衰到地下漏水可貫穿五層的吧！偏偏，由貪曾督工，趕急起好，總值花了港人血汗金錢近五十二億的新政府總部連立法會大樓，竟因一場「微不足道」的小火，自動灑水可以由十樓，一直穿透五層，順流到六樓去。

事發後，消防處及建築署發言人皆和稀泥的講大堆無關痛癢的解釋，唔係因為無人閂掉水喉，就係可能積水沿幕牆流下等廢話，總之要替政府開脫講門面說話。有份受「水災」損壞了私藏紅酒的張宇人則怒說：「一定要調查，又唔係漏電，點解無啦啦起火？九成係煙頭所致！」他的打擊面，係政見不同的對頭人，多過要調查這「豆腐渣工程」的源頭核心問題。

嗱！呢座「新大樓」，落成不足兩年，已先後出現無數的「豆腐渣」敗象。早日前試過黃色暴雨之嘛！便曾有水浸大堂的場面，當時針唔拮到肉，啲尊貴議員唔知痛無人出聲！

今劑水流流立法會大樓，表面上，是因為貪曾煲呔當年為貪威要趕住喺佢收皮前，係要入去讓屎忽坐一坐！

宣讀佢份「臨終施政報告」，但我卻希望審計署幫幫香港人，去查查呢座號稱可防禦八級地震嘅「危樓」，有乜「人為甩漏」，有無人做了「唔乾淨」的手腳，唔該！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東方互動iPhone/iPad/Android/Windows Phone Apps