SUN搞作：Sun官場現形記：「失敗的man」
貪湯至今亦未出嚟同大家交代醜行，但佢嘅衰嘢就愈揭愈多，原來貪湯係靠佢個「女朋友仔」，先至可以變身做「spider man」，喺內地搭線，認識高官。李衞為咗大家嘅知情權，幾經辛苦先可以同貪湯做咗個電話訪問……
李衞︰喂，喂，你畀人話靠「女朋友仔」，返上去搭線識高官。
貪湯︰無……無……無啲咁嘅事！
李衞︰你驚唔驚畀人話你要借女人上位呢？
貪湯︰我同佢情比金堅，點都離間唔到我哋嘅！
李衞︰咁又係，識到咁多高官，撈到唔少金，仲唔情比金堅咩？
貪湯︰我再重申一次，無啲咁嘅事！
李衞︰但你點會無端端識到咁多高官呢？
貪湯︰咁……
李衞︰嗱嗱嗱，畀我講中喇！
貪湯︰唔係，我係靠自己，好似「spider man」咁，自己搭線嘅！
李衞︰明明就靠人仲死撐，淨係叻飲茅台，真係個「失敗的man」！
