政壇：搞搞政：貪湯擦鞋親自接上司機
設計圖片及對白
近日「貪湯」前廉政專員湯顯明嘅擦鞋往績泉湧爆出，例如當年佢擔任海關關長時，要求飛行服務隊安排定翼機招呼內地海關人員「公費遊機河」，到擔任廉政專員時，又被揭發濫花公帑送禮兼宴客，確係花盡心思。不過，咪以為佢嘅奉承擦鞋功力只係得咁少，有傳佢最令人印象深刻嘅係大送「非物質禮物」。禮物都有非物質？
設計圖片及對白
據聞貪湯擦功寶典內有一招「親自接機」，就係喺上司出差返港後親自去機場接機。驟耳聽落呢招過於肉麻，僅屬冧招，難有大作為，但唔好睇少呢啲老套招數，據聞呢招曾令一啲看似外剛內柔嘅上司都差啲溶化。貪湯冧招雖然耍家，但可唔可以冧到班立法會議員仲係未知之數。
立會政府帳目委員會尋日去信邀請貪湯，同廉政公署社區關係處處長穆斐文出席調查聆訊。不過，呢封邀請信就由電郵發出，好似有啲兒戲。貪湯到依家都未有公開露面，之前都係透過一位「梁小姐」發言，立會透過電郵邀請佢出席聆訊，如果佢話收唔到都吹佢唔脹，唔知貪湯最後會唔會扮唔知，缺席聆訊呢？
