政壇：立會水浸議員損失慘重
梁繼昌嘅電腦同打印機都失靈。
因為立法會大樓嘅豆腐渣工程，社民連「長毛」梁國雄嘅十樓議員辦公室前日火警，灑水系統嘅水大量流落下層，累到十幾名議員間房水浸，好似九樓教育界葉建源最少有兩部電腦報銷，佢隔籬房嘅會計界梁繼昌亦難逃水劫，有一部手提電腦、一部平板電腦再加一部打印機全部失靈，就連佢心愛嘅名牌真皮公事包亦要提早「退役」，總共損失兩萬元。至於梁繼昌隔籬嘅資訊科技界莫乃光，七十張卡片都搞到濕漉漉，要鋪晒喺窗台曬番乾。
梁繼昌嘅電腦同打印機都失靈。
今次水災橫跨五層樓，由十樓一直漏水漏到六樓，所以喺八樓嘅批發零售界方剛都難逃一劫，佢枱頭部電視機同樣玩完。方剛黨友張宇人間房喺正隔籬，我哋前日影到張宇人嘅職員第一時間將房內十支紅酒擺出房外，張宇人話係驚酒樽上嘅招紙甩咗啫。酒樽上嘅招紙猶如酒嘅出世紙，如果甩咗就唔值錢嘞。
警方前日將有關案件交由中區警區刑事調查第三隊跟進，但尋日傍晚警方再出新聞稿話，案件現已升級交由中區警區重案組第一隊展開調查。無辜受害嘅議員表明要有關方面徹查事件。唔知當查明起火真相後，佢哋會否集體向長毛索償呢？
