政壇：田少猶抱琵琶半遮臉
設計圖片
立法會主席曾鈺成今日將會剪布，預算案有望最遲可以喺下星期一前通過。曾鈺成嘅裁決雖然得到建制派普遍歡迎，但就受到泛民主派責難，炮轟佢濫用主席權力，破壞三權分立原則，令立法會淪為行政機關的附庸品。雖然泛民批評剪布係意料中事，但估唔到連富貴黨榮譽主席「田少」田北俊都選擇猶抱琵琶半遮臉，企出嚟大鬧政府自製危機。
設計圖片
富貴黨之前已唔肯派人參與建制派輪更開會防流會，但喺建制派一致抨擊下，富貴黨終於肯派最少兩個人輪流坐喺議事廳。之後三十六個建制派又搞簽名聯署要求主席剪布，但富貴黨唔肯參加之餘，該黨嘅張宇人仲要死撐話咁做係唔想向主席施壓，覺得佢會自行作出英明判斷喎！
指行政機關干預立會
曾鈺成尋日宣布剪布，原本所有建制派跳出嚟大讚主席英明，但田少為求同其他建制派唔同，就跳出嚟話佢哋雖然尊重曾鈺成剪布裁決，但話音一轉後就批評政府「靠嚇」言論不負責任。
田少話政府呢幾日不斷聲稱如果預算案唔可以喺聽日前通過，所有社會運作將會停頓，佢批評呢啲言論係不盡不實同不負責任。事關佢認為政府有權再向立法會申請臨時撥款，冇理由唔畀議員充分時間辯論之餘，行政機關又可以幫立法會決定埋議員幾時要停止發言喎。其實政府一早已經講咗再次申請臨時撥款嘅做法並唔可行，唔通田少搭郵輪遊埠嗰陣冇睇報紙？
