SUN世代：美女多煮意
「邊個話選過港姐唔入得廚，我就係鍾意畀大家驚喜！」○八年參選港姐的Hilda（梁雅琳），美貌與智慧並重，惜大熱倒灶。但原來「男人禁地」才是她的小天地，為踩入烹飪界，不惜放下身段搵工，與一班嬸嬸「爭飯食」；甚至在食肆連踩十五個鐘，拖地洗碗樣樣齊，咁辛苦為乜？就係要接近夢想，現時她為不同品牌創作新菜式，為食材「配」出美食新定義！
懷有身孕的Hilda，已經為小生命預留「試菜員」位置。
Hilda喜歡於私家廚房內「煮」出一片小天地。
參選港姐時，Hilda（右三）認識不少好朋友。（受訪者提供）
Hilda十分疼錫妹妹，長大後更與她同赴加拿大升學。
於加拿大留學期間，Hilda經常到不同餐廳試食，順便偷師。
「我細細個就跟屋企人去試菜，食過唔少好嘢。」Hilda出身飲食世家，對味覺非常執着，加上父親開酒樓，耳濡目染下，對食物有更高要求；父母眼內，她是一名千金，被禁足廚房，Hilda表示，「雖然無得入廚房，但只要我試過嘅味道，我一定會記得。」
完成中六課程後，她與妹妹同赴加拿大升學，Hilda擁有一個屬於自己的「小天地」：私家廚房。「食唔慣外國口味，我就膽粗粗試下親手煮！」為提升技術，每日「喪煲」電視飲食節目及參考食譜，更寫blog分享煮食成果。
○八年，Hilda因參選港姐返港，打入五強，最終落選回加拿大繼續學業；雖然大學主修包裝及印刷設計課程，但她基於想做廚房，一○年回港後，即時報讀香港西廚學院的麵包西餅課程。「當時家人極力反對，我就同佢哋約法三章，三年內無成績，我就乖乖哋搵嘢做！」
就是對「食」的堅持，令Hilda不怕艱苦。在這三年內，她以「落選港姐」身份四出搵工，需放下身段，與一班嬸嬸同場「爭飯食」，人事部見她靚女又後生，以為她見錯工。成功獲聘後，當有人質疑其能力，她都會加倍努力，改變別人看法；巔峰時期，Hilda更日踩兩份工，朝八晚十一，廚房樓面沖茶樣樣齊，做得辛苦，是希望在不同崗位吸取經驗，為未來的廚師夢鋪路。
「之前有朋友想搞一個七十人派對，我自薦做食物到會，就算賺得唔多，但見到佢哋滿足嘅表情，一切都唔再重要啦！」其後，她更開設一間專營食物到會的「Hilda's House of Gathering」，未幾被電視台邀請拍攝飲食節目，知名度慢慢提升，後更獲得不同廣告品牌的工作機會。
現時，Hilda已成為一名「Media Chef」（媒體廚師），即在不同媒體曝光，替公司品牌以意想不到的食材配搭，創作新菜式。至於長遠目標，她則希望所創新菜式，打入顧客心中，賦予美食新定義！
梁雅琳小檔案
現職：煮飯仔Cooking Studio Media Chef
婚姻狀況：已婚
學歷：加拿大懷雅遜大學印刷及版面設計學位
興趣：插花、跑步、繪畫
