喺香港生活了一輩子，也未見過最近十個月來那簡直係無王法、無王管的咁多亂象，但講大話呃主子的奴才式欺下瞞上處事手段卻更多。

曾有人好有藝術地炎炎大語，說：「民生無小事。」係囉！既然知道路邊倒瀉屎都跟政府管治有關，咁點解今日香港政府高層，大事做不來，小事亦一團糟呢？

大事者，高層次的深層次問題，例如「政改」、雙普選、一人一票選特首、洗腦教育及搞掂港台、法輪功、支聯會、廿三條立法的四大任務，甚至將香港大陸化的加速完成……等等，已再不是甚麼天大秘密！但一啲進展都無。

小事一鑊泡之前，仲有啲「中級事」。只要求其揭開任何一日的報章，皆發現好多問題，例如昨日的：「東江水濁不可耐」，但年年加水費；立法會主席強行「剪布」會係違反《議事規則》，剪又死唔剪又死；未經諮詢的「先填海後規劃」被人媽叉；警方反智的延後拘控「佔中」義工，更讓人氣憤，何解有人犯法，警方不立刻「高調」拉人，反畀佢逍遙快活四處去廿二個月？咁做，怪不得曾蔭權和湯顯明一啲都無有怕啦！在此要問香港政府，係唔係畀呢兩條粉皮仲可以玩多廿個月先？

輪到小事嘞！啲食肆街霸直情當政府廢咗，無牌可繼續經營兼瘋狂阻街都無事，食環署應收皮啦！跟住不少曲藝社喺公園狂歌巨嗌，滋擾嚴重，康文署亦聽唔到，要有激烈投訴才去睇吓！家陣，除公園有「音霸」用大型揚聲器外，旺角西洋菜街啲「喇叭」仲響過紅館，亦無人理；加上，佢哋係開檔搵錢的！又話街頭表演唔准收錢？嘈到拆天，收錢點唱的犯法行為，因廢柴香港政府而得以橫行，亂唔亂吖？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps