尋日係母親節，社交網站上嘅議員們「洗板」上載慶祝母親節嘅活動。點樣突圍而出？田北辰搭建巨型吹氣滑梯慶祝母親節，黨友葉劉淑儀竟忍唔住放低幾吋高嘅高跟鞋，赤腳同小朋友玩埋一份。由網上嘅相睇嚟，佢就有少少拘謹嘞。佢玩完吹氣滑梯，又晒愛女葉榮欣有幾咁貼心，榮欣安排泰籍按摩師上門幫媽咪按摩，「梳乎」兩個鐘後再孖公仔出發去食飯，不知幾甜。

另一邊廂，阿Paul謝偉俊喺佢嘅選區內，以一身白色短褲襯鮮黃色西裝褸，再以一對白襪仔配螢光黃色波鞋落區派花，街坊想睇佢唔到都好難。佢呢身「巨鴨」造型喺早幾日去咗尖沙咀海旁同巨鴨合照，但佢上次着橙色鞋，襯番個鴨嘴。

第一手消息請下載on.cc東方互動iPhone/iPad/Android/Windows Phone Apps