政壇：搞搞政：位未坐暖先抽水 周一鑊呻窮
設計圖片及對白
財爺鬍鬚曾上星期五同「拉布四子」和談破裂，立法會預算案拉布戰正處膠着狀態。政府多名官員連日來車輪式露面，配以密集網誌隨筆，宣揚拉布搞到幾十個政府部門財政將陷乾塘，仲將矛頭直指拉布拖延落實惠民措施，尋日就連平機會都彈出嚟抽水，係首個公營機構公開呻冇錢。
設計圖片及對白
眾所周知，平機會主席「周一鑊」周一嶽鍾意唱歌，有官場技安之稱嘅佢，尋日出席完活動後，就加入政府部門「呻窮」大合唱，話平機會目前只有二千多萬元儲備，只佔以往每年九千多萬元撥款嘅兩成幾，加上儲備只係用作緊急需要及研究之用，擔心唔夠錢出糧畀平機會八十多名員工喎！佢話明白立會議員拉布嘅訴求，但議員亦要明白拉布對社會嘅影響，同埋要考慮拉布會否引起公眾反感。
老實講，周一鑊上任平機會主席一個月多啲，位都未坐暖，唔知公眾見到佢乜都未做過，就淨係識得攞錢，又會有乜嘢觀感呢？
