政壇：戴耀廷佔中當公民教育
「佔領中環」具體細節未定，但已挑動各方神經，但運動發起人之一戴耀廷尋日接受電視台訪問時，就狀甚無辜咁話自己唔係造反，而係做緊公民教育，讓大家去諗吓點樣去建構一個更好嘅民主制度。戴耀廷估計，具體特首普選方案喺明年先會出現，仲話已預留一年時間，有足夠位置讓談判出現，不過唔知呢個會唔會只係佢嘅主觀願望呢？
戴耀廷話，其實中央同佔中運動已露出對普選方案底線，至於之後要點走番埋一齊，佢就好樂觀同態度開放咁話，其實普選方案要符合《基本法》同國際標準都「好容易」，只係視乎點詮釋《基本法》。佢估計，最後經全民投票得出嘅特首普選方案唔會太激進。
至於會否與北京談判，佢就話：「肯定唔會無談判空間」，事關佢將佔中活動拖到咁長嚟搞，先要經公眾商討，再經全民投票，其實都只係想預留位置畀談判出現，希望唔使行到佔中最後一步。之不過，喺北京眼裏，佢係邊位呢？泛民又會唔會任由呢個搞公民教育嘅書生出去談判呢？其實佢嘅處境，睇落都幾寂寞。
