政壇：傳貪湯要女友 內地搭線

話說十幾年前做緊保安局副秘書長嘅「貪湯」，同陳詠梅發展地下情。有知情人士話，陳不時跟當時嘅入境處處長李少光返內地訪問，識落唔少內地官員，陳返港後，竟然以私人身份再帶「貪湯」返內地一轉，去結識呢班內地官員。原來經過幾年打好「基礎」，難怪佢可以做全國政協啦。貪湯去邊都要帶埋陳去，但陳又唔係湯太，有時令活動嘅主辦單位幾為難，唔知點安置呢位「陳小姐」。原來陳咁幫得手，幫貪湯搭通天地線。

去到海關，有關員話貪湯在任時冇乜建樹，但荒唐事就一籮籮，由於中港澳海關經常舉行體育比賽呢類聯誼活動，夜晚例必有下場，內地文宣部有一隊「辮子兵團」，即係由全女班上台唱歌獻技，有投訴人報料話，當時貪湯亦想喺海關搞番隊「辮子兵團」，但惹來好大反對聲音，最後當然擱置，但有擦鞋友點都要做番啲嘢，最後搵咗三個女督察上台唱歌，仲拍低咗短片，係真係假，真係要當事人至知。

炒車電召海關官員幫拖

該名關員仲話有茅台專員之稱嘅貪湯，○六年某日半夜三更飲醉，佢用政府車送女友返屋企，途經海底隧道時發生交通意外，佢即刻電召一名海關官員到場幫拖，最後同對方和解，無按程序呈報事件，而係自行搵人修理好架車。

熱愛打高球嘅貪湯，每逢到內地打波，班海關下屬都會幫佢訂好晒場地同酒店，認真唔話得，結果齊齊升官。貪湯○七年七月準備去法國訪問，突然被「貪曾」曾蔭權急召接替羅范椒芬做廉政專員，結果將貪腐文化帶埋去廉署，所以貪湯鍾意擦內地官員鞋同飲飲食食，絕對唔係一朝一夕，但就搞到廉署聲譽衰到極！

尋日最新鮮熱辣傳出一宗舊聞，係貪湯喺一○年只以齋啡款待加拿大一位部長，而無請佢飲茅台，足見佢親疏有別，唔會嘥鞋油，去擦無利用價值嘅人。