政壇：建制唔團結剪布戰艱難
立法會建制派議員尋日聯署要求主席曾鈺成手起刀落剪布，可惜四十三個建制派議員唔夠團結，口口聲聲反拉布嘅自由黨同醫學界梁家騮冇參與聯署，富貴黨嘅張宇人解釋，唔參與聯署係要畀主席絕對嘅自由度同空間就拉布行為作出裁決，該黨榮譽主席田北俊同方剛更齊齊唔喺香港去遊埠。梁家騮就話要貫徹一向低調嘅作風。
立法會變咗謾罵場，西九新動力梁美芬尋日喺會上忽然批評拉布議員，但畀主席教訓佢批評無理，又被人民力量陳偉業寸佢嘅言論有侮辱性。謝偉俊此時大鬧拉布議員講嘅嘢係垃圾，此語辣着長毛，反鬧建制派議員係食咗狗飯，主席裁定佢講咗冒犯性言論要收回，否則就要離開會議廳，最後長毛都死死地氣收回言論。另外，我哋尋日講過前日特首答問大會，政制局局長譚志源疑似玩緊遊戲，佢澄清只係睇緊文件。
