政壇：奀瘦馬雲怒喝渠蓋賊
阿里巴巴創辦人馬雲尋日榮休，網上咁啱亦有一份意外賀禮，事緣微博近期瘋傳一段片，片中係奀瘦馬雲向幾名懷疑偷坑渠蓋嘅大隻佬曉以大義，網友大讚馬雲充滿正能量。其實，呢段好人好事嘅片係電視台測試公民責任心嘅玩嘢之作，但馬雲就成為唯一一個肯出聲制止事件嘅路人。
片中內容據說喺好多年前，有幾個彪形大漢喺馬路邊撬「坑渠蓋」，似乎係要偷嚟賣，有個奀瘦青年見到，就踩住架單車兜咗幾轉，諗住搵人幫手捉賊，點知搵唔到警察，途人又唔敢出手，佢最後單挑班大隻佬，怒喝：「你給我抬回去！」雖然只係測試嘅事件，但馬雲都贏得唔少網民稱讚。
馬雲事後就解釋，話事發前幾日前先見到有報道話有小朋友跌落坑渠浸死咗，所以當時唔制止唔得，仲話自己出聲嗰陣，其實真係好驚，仲話隨時準備踩單車鬆人添。
