政壇：阿Ben高佬乖仔唔易做

阿Ben話，每逢母親節都會落區派花畀其他媽媽，但就從來都未試過送花畀母親大人。佢早幾日以為自己好乖陪媽咪食早餐就掂，但點知媽咪一邊食早餐一邊「o依o依哦哦」，話佢成日送花氹其他媽咪開心，但自己就一支花都未收過。阿Ben聽到媽咪咁講都覺得有啲慚愧，於是決定今年送番紮花畀媽咪補數。

高佬賢就話，媽咪之前同佢暗示過想換架新車，但佢就好坦白話自己買唔起多一架新車，所以惟有向媽媽介紹相熟嘅車房經紀，另加兩支黨友落區派發嘅毛巾花，就當係母親節禮物喎。雖然係母親節，但媽咪都決定當日煮大餐畀佢同細佬食，高佬賢就負責買響螺畀媽咪煲湯。

葉劉愛女禮物窩心

佢哋兩個頭痕，新民黨葉劉淑儀就坐定定歎世界，事關愛女葉榮欣（Cynthia）好有媽咪心，Cynthia知道媽咪日日喺立法會工作好辛苦，於是就趁住母親節預約一個泰籍按摩師上門幫媽咪按摩，等媽咪足不出戶就可以過一個窩心而舒服嘅母親節。