SUN搞作：打橫嚟講：驗身唔驗腦的公安爛仔
香港人憤怒鳥！這兩日，網上的討論區和面書，幾乎一致的洗版狂插。
唉！香港的「獅子山下精神」，在一些廢柴庸官執政下，又一再減弱；甚至，有知識分子文藝腔的呼喊：「香港，消失了！」
香港警方前日失驚無神，拘捕一個「佔領中環行動」的義工，控告她在二十二個月前「協助」和「參與」未經批准的非法集結。請六七年搞暴動的「老友」，小心呀！唔知幾時輪到你哋？
拉人咪拉人囉！但係警務處長曾偉雄卻出來辯說今劑行動並非政治打壓，「唔知邊個係『佔中』嘅所謂義工」，哦！警方的情報組好九流啫！
警方又推責話今次拉人，乃係律政司嘅主意，即使卸膊，但亦反映無腦得好可憐囉！讓人記起佢入行嘅年代，坊間話啲差佬係「驗身唔驗腦」嘅爛仔囉！哼！世界大倒退！
話佢無腦，就因為今時今日咁嘅社會氣氛下翻舊帳，咪激起民憤，有助六四、七一增加上街人數！白癡！
律政司及警方唔只無知，仲無能，佢話通緝咗那疑人好耐，點知，人家曾與特首一齊上北京做採訪；另外，警方又話唔去疑犯辦公室拘捕，係免影響她的同事喎！
吓！亦有人說，可能因疑人是記者身份，警方不敢去報館抓人，怕敏感喎！咁就好笑矣！據這邏輯，咁喺特首辦、中央政策研究所、一國兩制研究中心同重建局內，咪好易係窩藏重犯嘅收容所？
梁振英特首昨日在立法會答問會裏說，「法治社會，不應犯法」o架！當湯顯明用茅台換政協，被全港七百萬人「喊打」嗰陣，唔通有人想用暴政換中央公安局長？好呀！睇吓點？走着瞧吧！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
