壹全霉賣股多波折，搞到淫賤黎最近神經衰弱，成日聽錯人講嘢，就好似少膽虫上次細細聲講佢聽壹全霉發盈警，佢即刻嚇到彈起哇哇叫：「刑警？唔好拉我呀！我嘅億元淫業係合法生意o架！」少膽虫解釋咗好耐，先講得明畀佢聽咩叫盈警。「哦，即係我無犯法啦？」淫賤黎笑逐顏開。「咁又唔係，就算明知你住喺堆填區，警察鍾意喺犯事兩年後先至拉你，都得o架！」少膽虫話音剛落，淫賤黎房門就突然爆開！

「淫賤黎，我哋係國際刑警！你涉嫌從事低俗文化販賣、經營國際賣淫集團及偷睇阿婆沖涼，依家要拘捕你！」一入門口持槍指住淫賤黎。淫賤黎匿喺枱底高叫：「唔好屈得就屈喎！我嗰次剩係推阿婆落樓梯咋，頂多踩多一腳……」那刑警堅持道：「你再拖長都無用……」點知淫賤黎耳病又發作，哭道：「Torture（折磨）？無人權喇！我要申請酷刑聲請！」此時已偽裝成盆栽嘅少膽虫，都忍唔住講句：「佢話你拖長呀，腦細。」

淫賤黎伸冤話：「我邊有拖長喎？」刑警即刻質問：「咁你個股係台灣畀人扣住，你做咩拖長唔講？」淫賤黎即時口啞啞，雙手下意識擋住傷痕。少膽虫護主心切，即話：「扣扣扣，你唔好見到肥肉，就以為係梅菜扣肉先啦……」

刑警唔耐煩喇，大鬧：「唔好再亂噏喇！總之今日我要扣個人番去！」淫賤黎一聽，從枱底伸頭喜問：「你都係想扣起我嘅資產啫，係咪？」刑警唔知佢葫蘆裏賣咩藥，只是輕輕點頭。「咁得啦！」淫賤黎衝出嚟，一手的起少膽虫，陪笑話：「呢件係本公司最值錢嘅資產，拎去啦！」

少膽虫

第一手消息請下載on.cc東方互動iPhone/iPad/Android/Windows Phone Apps