政壇：政商定格：施穎茵騷理財Apps突死機
施穎茵話會喺今年第三季，將流動支付擴展到Android手機。
順應香港人「機不離手」嘅習慣，愈來愈多銀行推出手機應用程式（Apps）方便客戶，滙豐銀行尋日就發布咗名為「HSBC HK」嘅流動理財Apps，該行香港區零售銀行及財富管理業務主管Diana施穎茵仲親自現場解說個Apps點用添！
施穎茵話會喺今年第三季，將流動支付擴展到Android手機。
為咗示範個Apps，大會準備咗個大型模擬iPhone，點知示範中途個模擬iPhone螢幕突然冇反應，正當眾人諗緊對策嗰陣，Diana就笑住話：「喺正常情況個Apps唔會咁o架！」喺示範過程裏面，佢仲要當眾輸入模擬嘅銀行網上密碼，佢同在場朋友風趣咁話：「呢個密碼係唔應該畀你哋睇到o架！」
除咗滙豐之外，花旗香港都喺日前推出咗Citibank for iPad嘅Apps，畀客戶查閱銀行戶口同信用卡資料及交易，原來呢個Apps喺亞洲、拉丁美洲同歐洲其他主要市場仲未推出，咁香港咪算係快人一步？
