政壇：搞搞政：暗撐拉布泛民評分急挫

香港研究協會喺上月三十日至五月七日，即預算案拉布戰開打期間，成功訪問咗一千一百六十七名市民，問吓佢哋對三十五名直選議員同五名超級議員嘅評分。結果二十一名泛民議員（唔計傳統功能界別議員）當中，有十五人評分下跌，僅六人上升。喺十九名建制派議員當中，則有十二人評分上升，只得七人下跌，反映泛民嘅拉布行為不得民心，變相益咗對手。

發動拉布嘅四名泛民議員梁國雄、黃毓民、陳偉業同陳志全，評分一如所料全線下跌，但跌幅相對輕微，反映拉布對佢哋嘅影響有限。反觀聲稱唔支持拉布、但實際上暗撐拉布嘅公文袋梁家傑同陳家洛、白鴿黨胡志偉、何俊仁同單仲偕，以及工黨李卓人同何秀蘭，評分就顯著大跌。其中梁家傑、陳家洛同李卓人，更加係今次調查中跌得最多嘅三甲，估計係同兩黨對拉布立場表裏不一，即係聲稱唔支持拉布、但實際上暗撐拉布，以及李卓人喺碼頭工潮中嘅表現有關。